Lo serpent
Sal flanc d’la montanha lhi a de grandas eslindiras de ròchas e jaira: son «las vias del serpent»!
Dison qu’ilamont, entre ròchas s’la broa di gorjons, viu un terrible serpent que mincatant cala aval e, butant-se per travèrs del riol Còla, n’en fai sautar fòra las aigas.
Es un serpent que pilha formas e colors diferèntas a seconda d’qui conta l’istòria: a doas testas e lhi uelhs de fuec, una granda testa embè una cresta rossa, la coa dobla, escalhas que la sera se tenson de ros, subla talament que sovent fai destachar de chalanchas…e enca’ de pejor!
Una legenda conta coma sie naissua la valada profonda del Còla.
Un cavalier que venia da la França era estat chamat da lhi abitants de la valada perqué lhi libereisse da un drac feróç qu’empachava ai tropèls d’anar en pastura.
Lo cavalier, coneissut coma Jean la croix, vai contra la bestia e aprés una lònja lucha arriba a maçar-lo.
Lo drac dròca per la còsta entre pei ras e plantas fins al fons des Frandias.
Da la ferita sortia un liquid verd que comença a colar aval en mila pichltas cascadas e lamas. Era naissut lo riol Còla!
Lo montanhard que viu sempre da solet, la natura dura e sarvatja, lo combattre tuchi lhi jorns per eschancar a la terra maigra lo racòlt, las nombrosas chalanchas e las aluvions, lhi lòngs uverns entre auta nèu fan correr la fantasia e la pòrton a crear d’explicacions surrealas e estonantas a las istòrias.
