Companhia di lesinants
Tot un país per una companhia teatrala. Pi de cent personas de totas las levas fan part del grop “I Lesinanti” de Bueves, renaissut ental 1982.
La companhia a una lònja istòria: las originas remonton al 1500 quora “I Lesinanti” rapresentavon chasque tres ans, per Carnaval, una istòria popolara bovesana: “Lo mariage de Madòna Lesina”, naissua per difondre las reglas de l’estrecha parsimònia, a travers la personificacion de virtuts, vicis, opinions, en maniera amusanta.
Juant sus lo sens de la paraula “lesina” se suslinha lo caracter del bovesan, retengut un pauc tirat, avar.
La premiera edicion remonta al 1859, coma documentat dal quadre de Romano Vittori gardat a la Comuna e la tradicion continua dins lhi ans seguents bèla si en maniera pas regulara.
Fins a l’edicion del 1923, “La Lesna” es estat un espectacle de Carnaval ente lhi ròtles des fremas eron empersonats da òmes.
L’istòria conta lhi preparatius per lo mariatge de la jove Lesina embè Messer Trivello Foranti.
Preparatius e mariatge serèn organizats en granda economia, embè situacions amusantas.
Basta pensar ai noms di personatges: Messer Tiratello, Donna Parsimonia, Messer Lesiniero, Madonna Forbicetta, Messer Agoccion degli Spuntati (paire de l’esposa), Madonna Tenaglia e Stringarotta.
La rapresentacion finís ental 1938 e ven arpilhaa ental 1982.
Lhi abitants tornon en plaça e esfilon per las vias embè las anticas vestas. L’espectacle ven mai propongut lhi dui ans aprés per la festa del sant patròn.
La Companhia di Lesinants aprés organiza espectacles en italian e dialect coma “Le meravigliose avventure di Lazzarino da Tormes”, “La gabia du marlu” e “La sconosciuta”.
