Lo Cinq e Sieis Cents
Ental 1424 Vaudier torna sot lhi Savòia, fins al tractat de Cateau Cambresis (1559). Ental Cinq Cents ven realizaa la chapèla dedicaa a la visitacion de Maria a la cosina Elisabetta. Lo duc Carlo Emanuele I ental 1620 la rend contea, e l’enfeuda a Sebastiano Valfredo senhor de Castel Rainero. Lo premier document relatiu a l’esfruchament des aigas chaudas remonta al 1588, quora la comuna de Vaudier realiza un premier estabiliment termal. Ental 1630 la pest fai centenas de victimas. L'an d’après de celebron 58 mariatges, sustot entre vidoas e vevos. Lo 19 d’octobre del 1688 la comuna ganha lo drech d’esponer l’estema. Las guerras d’aquesti ans, bèla si truchon pas directament lo paìs, an de consequenças sus la sia economia. Lo Santuari de la Madòna del Colet, sus l’aigavers entre las valadas Ges e Estura, ven fondat ental Cinq-Sieis Cents, temps de pest, da la religiositat popolara, documentaa dai nombrós ex voto: l’edifici d’encuei totun remonta al 1758. Una legenda popolara fai remontar l’origina del Santuari a Constantin. Ele auria agut la vision de la Crotz mentre fasia una sosta ental combal de Demont. Montat de bon’ora per observar l’acampament del siu exercit auria vist la crotz denant al solelh que montava sentent las paraulas “in hoc signo vinces”. Pr’aquò sus l’estema de la comuna lhi a una crotz.
