Gai Saber
Lo nom ven da una antica esfida poetica entre literats del XIV sècle; lhi textes e la musica s’arfan a la richa tradicion orala e ai ritmes des danças occitanas. Despuèi lo 1992 l’objectiu del grop es estaa l’union de la tradicion de la musica da dança occitana e des chançons di trobators medievals embè l’estil de la musica d’encuèi; dapè di tipics instruments tradicionals (viola, semiton, chabreta, fifres) lhi Gai Saber ajonton instruments moderns e sustot timbres electrònics: l’arranjament arsina diferèntas dralhas de la musica contemporanea. Dapè a la recercha musicala constanta per integrar lhi contrastes entre fòlk e electrònica, da l’analisi di textes de la producion Gai Saber sòrt un percors linguïstic interessant. Dins lo premier CD “Troubar r’òc” (1997) dapè a tòcs trobadòrics, se retròbon un baron de textes en poranhin, sie de nòva composicion que tradicionals (Checalot, Jouan bala mei que Perou); la grafia adobraa per la transcricion es aquela “concordaa” (Escolo doòu Po). Embè aqueste disc lo grop s’aramba a sias raitz e lo trabalh de recercha s’enteressa sustot a chançons e tradicions de Poranh. Dins lor percors, decò gracias a l’experiença de concèrts fòra Italia - sustot dins la França del Sud, la parelh dicha Occitania Granda (Festival Estivada a Rodez, Feria de Beziers, Strictly Mundial a Marsiglia, Les Suds a Arles, Fiest’a Sète) - lhi Gai Saber comprenon que lor parlaa es ma que una des tantas variantas d’una lenga comuna dal passat gloriós e nòvas potencialitats per lo futur.
Ai textes tirats da la tradicion occitana, s’ajonton sempre pi sovent autres de nòva composicion; per arribar a un public mai grand, lhi Gai Saber cernon d’adobrar la grafia classica jà adobraa despuèi d’ans da lhi Occitans al de lai des ALps (despuèi lo 1945, temps de fondacion de l’Institut d’Estudis Occitans de Tolosa) , e d’adoptar un lexic menc localista. Lo darrier CD “La fàbrica occitana” (2006) propon de liricas de nòva composicion (“Chalendas de mai”, “Clar de blòi”) ente es evident lo trabalh de recercha sus las paraulas e lor son; lo resultat es natural e poetic. Dapè a l’activitat concertistica, lhi Gai Saber collaboron embè nombrosas escòlas de la provincia de Coni per permetre ai joves de conoisser e apreciar la musica, las tradicions, l’istòria e la lenga de l’Occitania.
Cd publiats: Troubar r’òc, Esprit de frontiera, Electroch’òc, La fàbrica occitana.
