Roascha

La comuna de Roascha es plaçaa a 822 m d’autessa ent’un valon a la drecha del riu Gès. Sias fracions son ben nombrosas: Armaris, Bambes, Bandit, Barlòt, Beloimo, Blava, Brinda, Burgioi, Caplin, Clòts, Còla, Crivela, Cudre, Farinet, Ferri, Franquin, Gaia, Garacet, Goderias, Gorrè, Limbo, Lombard, Mac, Malanotz, Milin, Montfranc, Mondin, Moni, Noriòla, Panet, Peiri, Pilhon, Polonguera, Prefet, Quatin, Reina, Rei, Ris, Rivas, Sablons, Sant Bernard, Stringa, Tabanòt, Titon, Trafuelh, Vial, Viròta. Se tròbon totas a l’adrech, menc que lo cap luòc, la Vila, emè la parroquiala baròca dal maestós cloquier dediaa ai SS. Dalmatz e Bernard e lo palais municipal emè solaria del 1865, a l’ubac coma lhi pasquiers. Lo vilatge es documentat emè lo nom de Roascha (an 1198), Rovasca (an 1246), Roascha villa Roasche (an 1262): lo topònim veneria da rubus, ronça, coma pòst des ronças o país dal pichòt riu entre las ronças, ma quarqu’un lo voleria adcrescitiu de ruaa, emè lo sens de gròssa ruaa.