Museu de l’armòni, musica e art popolara
Lo musèu es estat realizat per acompanhar lo public ent’un pichòt viatge en l’istòria e las caracteristicas d’l’armòni e per testimoniar la sia fòrta presença en Val Vermenanha e sustot a Robilant. La musica e lhi bals son la tradiccion pus partecipaa ent’aqueste paìs abo un rapòrt entre numre d’abitants e de sonadors entre lhi pus auts enti paìs italians. En totas las familhas robilantesas lhi a almenc un armòni o un clarinet e pròpi aquesti instruments eron e son sempre presents a las fèstas: enlora enti òstos e a las velhaas d’uvèrn; encuei enti festins d’istaa e ai conscrits.
Pr’aquò es naissua l’idea de realizar lo musèu gracias ai contributs europèus del GAL e d’la Comunitat Montana. Lhi trabalhs, començats ental novembre del 2003, son finits abo l’inauguracion a mai del 2005.
Lo musèu vira a l’entorn de dui importants personatges robilantés: lo premièr es Nòto Sonador (Giuseppe Vallauri 1896-1984), òme simple que sabia far un pauc d’tot: sonador, sustot a realizat, arranjat e acordat lhi armònis coma autodidacta. Legendaria era la sia aurelha musicala, que polia entendre diferenças tonalas minimas e classificar tuchi lhi sòns abo la nòta corrispondents: lo suble d’una sirena, un chant d’aucèl, lo clacson d’una maquina eron subit identifiats abo una nòta del pentagrama. Lo second personatge es Jòrs de Snive (Giorgio Bertaina 1902-1976), un escultor del bòsc que abo son cotèl, en estatuas e bastons, nos a laissat de rapresentacions de vita popolara (coma un libre entalhat ental bòsc): dai bals ai sonadors e a las bèstias del bòsc, mas decò scenas coralas (coma aquela realizaa sus un baston abo lo rubalici a l’osteria d’l’Aquila Reale ente avia rapresentat lhi ladres arrestats dai carabiniers, lo tirèt di sòuds dubèrts e Gepin e Ginòta abo lhi clients). Purtròp ental musèu son pas gardats lhi originals, mas se tròbon las còpias fidèlas realizaas da Renato Allinio.
Coma lo chant e la musica en lhi òstos eron "una còsa mec per lhi òmes", lo bal era lo moment de rescat decò per las fremas. De fach las coblas balavon e balon encara la "correnta" e lo "balet". Valai l’idea d’esponer las vestas del grop folcloristic "I Balarin di Barme" di Robilante. Un bòt eron las vestas d’la festa: l’òme avia l’eschirpa rossa en vita si lo racòlt era estat bon, e era escura ental cas contrari.
Aqueste e ben d’autre, pòl meritar una visita al pichòt tresòr de cultura popolara de Robilant.
Duberturas ISTAA 2020
Torna a durbir, aprés aver sarrat obligatòriament per l’emergença covid. Tantas nòvas, totas per respectar las nòrmas per la prevencion e gestion d’l’epidemia da covid-19. Drant tot, coma lhi autres musèus de Robilant, serè dubèrt diamenja 28 de junh, 5 e 19 de lulh, 2 -16 e 30 d’avost abo aqueste orari 10-12 e 15-18.
Serè obligatòri portar la masquerina per tota la visita e drant d’intrar se igienizar las mans o butar lhi guants, e serè vietat se baronar; pr’aquò en relacion a lhi espacis polerén intrar ensemp mec fins a 8 PERSONAS.
Visita guidaa de 30 minutas, chasque mes’ora (darrièra intrada 11.30 e 17.30) Possibilitat de prenotar la visita guidaa, per èsser segurs d’intrar e evitar de far la coa de fòra.
email: museofisarmonicarobilante@gmail.com;
Tel: 3288655394
Adreiça: Via Bartolomeo Ghiglione n. 7
Intrada: oferta libra
