Lo Carnaval Alpin de l’Ors de Seèl

Tuchi lhi ans, per Carnaval, per las vias de Vaudier se fai lo Carnaval Alpin de l’Ors de Seèl. La tradiccion de l’ors a Carnaval es ben antica, e en las culturas alpinas avia la valor d’esorcizar la paor vers las bestias sarvatjas di bòscs: l’ors que se dervelha es un senhal que l’unvern es esquasi finit. Abandonaa per detzenas d’ans, es estaa arpilhaa fai qualque an: un òme cubert de gambs de seèl entortolhats fai l’ors, lo sarvatge, que ven enchaënat dal domator e ariondat da filhets vestits da peroliers, e da grands vestits da fraires, que recitons poesias irònicas sus las familhas del país. Lo corteu embe l’ors a la chaëna passa per totas las vias del país al son de lhi instruments tradiccionals, en demandant a chasque maison uòus, dòuç e vin, e a la fin ben brusat sus lo fuec. Un bòt per Carnaval se fasion lhi nhòcs, l’eleccion de lhi Abats, lo talh de la testa d’un jal o d’un chat, lo testament del Carnaval e arribava la Quaresma, mas encuei l’Abat e la decapitacion lhi son pus.