Las Alps Maritimas
Las Alps Maritimas marcon lo confin entre Italia (Provincia de Coni e en minima part Provincia d’Imperia) e la França (departiment Alps Maritimas).
Las Alps Maritimas en las diferentas classificacions alpinas an jamai mantengut la mesma extencion. Second la Particion des Alps del 1926 las Alps Maritimas formon una seccion des Alps Occidentalas e comprenon decò las Alps Liguras. Son dividuas en Alps Liguras e Alps del Var.
Second la Suddivision Orografica Internacional Unificaa del Sistema Alpin (SOIUSA) del 2005 las Alps Maritimas son una sotseccion alpina qu’embe la sotseccion Prealps de Niça forma una seccion des Alps Sud-occidentalas. Las Alps Maritimas confinon a nòrd embè las Alps Còcias, das qualas son separaas dal còl d’la Madalena; a est confinon embè las Alps Liguras; a sud embe las Prealps de Niça, das qualas son separaas da la Baissa de la Cabaneta; a òvest las Alps de Provença das qualas son separaas dal Còl d'Allòs. Lo nom testimònia lor tipicitat: embe las Alps Liguras, son lo tòc d’Alps pus aramba a la mar.
En las Maritimas son jà evidentas las caracteristicas des Alps Occidentalas, agulhas e crests ponchuts, canalons e grandas clapieras, valons estrechs d’origina fluviala e valadas pus dubertas d’origina glaçala, nombrós lacs e autas montanhas.
Geologicament, las Maritimas alternon ròchas calcareas e dolomiticas a ròchas graniticas (coma lo massìs cristalin de l'Argentiera en Val Ges), totas modelaas da l'accion erosiva milenaria di glaciers. Lhi dui aigavers des Alps Maritimas son protejuts: dal cant italian se tròba lo Parc Natural des Alps Maritimas, sus aquel francés, lo Parc naccional del Mercantor, famós ental mond per la Valada des Meravilhas, embe mila e mila incisions en la ròcha de l’etat del Bronç. Lhi dui parcs confinon per 35 km e concorron a formar, ensemp, un territòri protejut de mai de 100 000 ectars, que, en futur, poleria deventar lo premier Parc internaccional transfrontalier.
