Las originas

Lo territòri de Vaudier devia esser popolat jà 3500 ans fai, vist que al principi del 2000 es estaa retrobaa una necròpoli a cremacion, sus la via vielha, ent’un combal entre autas ròchas. Adobrats en l’etat del Bronç Recent (1.350-1.200 a.C.) e Final (1.200-900 a.C.) e puèi torna en l’etat del Fer (625-475 a.C.), lhi recints funeraris son visibles al public, protejuts da una estructura en bòsc e descrichs da un cartel. Lhi fardèls funeraris, embè las reconstruccions de la necròpoli e autras informacions son gardats al Musèu de la Resistença e del Territòri de Vaudier.